حاجيتكم على للي في كازابلانكا ماشي فداككا ..كتكنى بالصاد أو هي صفرا ؟....جيرانها كلهم رحلو معا صحاب الهجرة ...شي في لهراويين او شي في فرانسا او لميريكان او طاليان الغبرة ...ايه يازمان بقاو غير الأطلال او الدنيا قفرا...مشاو لكليان ديالك يا ديك الصفرا ؟...سبحان للي اعممر لمكان ويخليه سبحان مول القدرة ....احدا هاذ المعلمة اسكن خوكم عاطف او في مدرسة الجاحظ اقرا ....او لعبنا الكورة معا الشينوا او كاماراض او العاب اخرى....الطرونبية او البي او دينيفري ماكاين غير السكرتيح او الجرى ....احداها عوينة بماها تروينا او عرفنا عالم الحب او لمرا ....كنت نجي نسكي منها باش نشوف اول حب ديال العشرة ....نتفاهمو بالبسمة بالغمزة بالهمسة بالنظرة ....تمنيت دابا نشرب من ماها لاخر مرة ...حياتنا بلا حب او ذكريات علقم مررة ....ذكرياتنا في الكاريان لب حياتنا او الباقي قشرة ....عالم الحب كان محاصر كايبغي السترة ....حومتنا كان ضوها خافت يكفينا مع ضو الكمرة ....نتسامرو او نبسطو او نغنيو الغيوان او لمشاهب حتى تحلى السهرة ...كانت عمتي لعزيزة تزورنا او تعطيني عشرة ...عشرة اكبرمن الدرهم صفرا نحاسية تفتح لي بيبان !!! الله ارحمك يازينة البشرة ....شحال من كاسكروط درنا تما ديال لحم الراس او كرانادا او الصوصيص او الهبرة ....تما تولدو عولامةاو فنانة او كوايرية بكثرة ...تما اسمعنا نكث كيرا او جولات الطاس في الحفرة ....كانت الكورة متعة ماتشوفهاش دابا في الحمرا او الخضرا ....مابقات لا كورة لا والو غير الشغب او المنشطات او البيع او الشرا ...لعاب كايتباع بلملاين او لاخر ايضربوه بحجرة ...أحداها تربينا على لخلاق الزينة مع الكادحين او لفقرا ....او ضحكنا في الحلقة معا اخليفة او بوغطاط او لمسياح او شحال من نمرة ....تما اكرينا لبرامي لعراسنا او اددينا الغياطة او صحاب الوثرة....او للي جاتو التونية امشي عند شفناج تما ايبرا ....تما اقرينا ماتعلمنا ضصارة ولا قمرة ....جالسنا صحاب الحكمة او العبرة او حتا صحاب الخمرة ....ماتعلمنا تشرميل ولا شغب ولا شفرة ...شحال كدي نحكي ليكم مستملحات او طرائف ديك الفترة ....ماكرهتش نعاود ليكم اخخوتي كل ما جرى ....جاتني دمعة او تحبسات ليا الهضرة ....مابقا غير نقول ليكم ياحسرة على ذاك الزمان او ياحسرة ....!!!!